Urte kopurua murriztu arren, zigorrak mantendu ditu Gorenak

Espainiako Auzitegi Gorenak murriztu egin dizkieBateragune auziko auzipetuei Espainiako Auzitegi Nazionalak jarri zizkien zigorrak. Arnaldo Otegi eta Rafa Diezi hamarretik sei urte eta erdira jaitsi die zigorra, eta Miren Zabaleta, Sonia Jacinto eta Arkaitz Rodriguezi, zortzitik seira.

Otegi eta Diez erakunde armatuko zuzendaritzako kidetzat jo zituen Auzitegi Nazionalak. Gorenak atera berri duen epaiak dio, zuzendaritzako kide ez zirela, baina bai erakunde armatuko kide. Horregatik murriztu die espetxe zigorra. Nolanahi ere, Auzitegi Nazionalaren tesi nagusiari eusten dio, eta ezker abertzalea bide politiko eta demokratikoen alde lerratzearen alde egin zuten lana ETAren aginduak jarraituz egin zutela berretsi du. Gorenak dio ezker abertzaleko kideak ez zirela lan politikoa egiten ari barne eztabaidarako akuilu lanetan aritu zirenean. ETAren aginduz Batasuna berregituratzea egozten die Gorenak zigortu guztiei. Auzitegi Nazionalak jarritako inhabilitazioari ere eutsi egin dio Gorenak.

Epaiak bi boto partikular izan ditu: bat, absoluzioaren aldekoa, eta bestea, epaiketa errepikatzearen aldekoa. Miguel Colmenero da boto partikularra idatzi duenetako bat. Haren ustez, Arkaitz Rodriguezek eta Arnaldo Otegik arrazoia dute epaimahaiaren kontrako errekusazioa jartzean. Epaia eman zuen Auzitegi Nazionaleko epaimahaiaren inpartzialtasuna zalantzan jarri daitekeela dio, eta beraz, beste epaiamahai batekin epaiketa errepikatu behar litzatekeela uste du. Gorenaren epaia idazteko ardura Colmenerok zuen, baina desadostasuna ikusita, ponente izateari uko egin zion.

Bigarren boto partikularra Alberto Jorge Barreirok idatzi du. Hark dio absoluzioa emateko arrazoi indartsuak daudela, eta Otegik jarritako errekusazioa onartzeko eta epaiketa berriz egiteko beharrik ez dagoela.